Nota del Comité Intercentros de La Voz de Galicia

A plantilla de La Voz de Galicia esixe o mantemento do 100% do emprego antes de entrar a negociar coa empresa.

A dirección de La Voz de Galicia iniciou, o pasado 8 de maio, o período de consultas para a inaplicación do convenio colectivo co obxectivo de abordar rebaixas salariais durante o período 2013 e 2014, que se traducirían nunha rebaixa para o 2013 de entre un 15% e un 16% do salario base e un 66% dos complementos, e para o 2014 dun recorte dun 14 ou un 15% do salario e un 33% dos complementos, pese a que as contas presentadas recollen que a empresa rematou o 2012 con máis de medio millón de euros de beneficios. Esta negociación pechouse sen acordo entre as partes e os representantes dos traballadores e a dirección da empresa están citados para unha comisión paritaria este xoves, 30 de maio, as 16 horas.

Con carácter previo a esta nova rolda de conversacións coa empresa, celebrouse o pasado domingo 26 en Compostela, unha asemblea de traballadores na que a plantilla respaldou que se antepoña ao inicio de calquera tipo de negociación o mantemento do 100% dos actuais postos de traballo ata a firma do seguinte convenio.

Se ben a empresa xustifica, aínda que non presentou toda a documentación esixida polos representantes dos traballadores, a súa Proposta do 66% nas malas perspectivas económicas e o retroceso xa padecido o ano pasado, desde o comité remarcouse que no 2012 a cifra de negocio de La Voz de Galicia reduciuse nun -6%, os soldos e salarios da plantilla fixeronno a un ritmo catro veces superior (-14%), o número de persoal baixou nun -13,5% e, nese mesmo período, as retribucións da alta dirección só o fixeron nun -1% e as abonadas neste concepto na sociedade dominante do grupo de empresas (Corporación Voz de Galicia) medraron un 11,8%. 

Os traballadores levan anos asumindo importantes sacrificios tanto a nivel económico (a empresa aforrou un 34% en salarios entre o 2008 e o 2012) como de destrucción de emprego (con 187 traballadores menos) e defenden que o actual convenio colectivo aínda é unha ferramenta válida como plan de aforro. 

O Comité tamén cuestiona que a dirección da empresa queira transmitir unha imaxe de debilidade do compañía para forzar a plantilla a asumir máis recortes cando nunha situación de crise do sector, como a que se está a padecer, a actividade editorial de La Voz de Galicia só caeu un 6%, mentras medraba o seu patrimonio neto, o seu fondo de maniobra e reducía as súas débedas. Ante esta situación e os continuos incumprimentos nos últimos anos por parte da directiva, o Comité esixe a dirección garantías inequívocas alomenos de que se manterán os 352 postos de traballo actuais antes de sentarse a negociar novas medidas que axuden a mellorar a situación competitiva de La Voz de Galicia.

Pódense seguir as novas do proceso en: http://comitelavozdegalicia.blogspot.com.es/